KONTROLLI SHTETËROR I EKSPORTEVE

Autoriteti Shtetëror i Kontrollit të Eksporteve
“Autoriteti Shtetëror për Kontrollin e Eksporteve (AKSHE) është institucioni qendror shtetëror, me status personi juridik publik, në varësi të Ministrit të Mbrojtjes, i ngarkuar me zbatimin e politikës kombëtare në fushën e kontrollit të transferimeve ndërkombëtare të mallrave të kontrolluara.

Qëllimi i AKSHE-së është të garantojë mbrojtjen e interesave të sigurisë kombëtare, përmbushjen e angazhimeve ndërkombëtare të Republikës së Shqipërisë për mospërhapjen e armëve të shkatërrimit në masë dhe të sistemeve të tyre të përhapjes, si dhe kufizimin e transferimeve të armëve konvencionale dhe të mallrave që mund të përdoren për qëllime terroriste apo të paligjshme. Objekt i veprimtarisë së tij janë mallrat ushtarake, artikujt dhe teknologjitë me përdorim të dyfishtë, lëndët plasëse për përdorim civil, si dhe lëndët piroteknike, në përputhje me legjislacionin në fuqi.

AKSHE kryen:

• Verifikimin dhe kontrollin e plotë të dokumentacionit dhe mallrave të kontrolluara në të gjitha fazat e licencimit;
• Lëshimin e licencave dhe autorizimeve për eksport, import, tranzit, transship, ndërmjetësim dhe asistencë teknike;
• Marrjen e masave administrative ndaj subjekteve në rast shkeljesh ligjore;
• Zbatimin e masave kufizuese dhe embargove ndërkombëtare;
• Zbatimin e klauzolës “catch-all” për artikujt që nuk janë të listuar por që mund të përdoren për qëllime të ndaluara.

Veprimtaria e AKSHE-së bazohet në procedura ligjore transparente dhe të dixhitalizuara, duke ofruar akses të gjerë informues dhe asistencë për subjektet tregtare. Gjithashtu, AKSHE bashkëpunon ngushtë me institucionet kombëtare dhe ndërkombëtare në këtë fushë, duke kontribuar në sigurinë rajonale dhe ndërkombëtare.”